Medieval and Renaissance Women's Voices

Fils, je n'ai mie grand trésor
Pour t'enrichir, mais, au lieu d'or,
Aulcuns enseignements montrer
Te vueil, si les vueilles noter.

Dès ta jeunesse pure et monde,
Apprends à connaître le monde,
Si que tu puisses par apprendre
Garder en tous cas de méprendre.

Ci Commence l'Epistre au Dieu d'Amours

Cupido, roy par la grace de lui,
Dieu des amans, sanz aide de nullui
Regnant en l'air du ciel trés reluisant,
Filz de Venus la deesse poissant,

Sire d'amours et de tous ses obgiez,
A tous nos vrais loiaulx servans subgiez,
SALUT, AMOUR, FAMILIARITÉ.
Savoir faisons en generalité
Qu'a nostre Court sont venues complaintes

Par devant nous et moult piteuses plaintes
De par toutes dames et damoiselles,
Gentilz femmes, bourgoises et pucelles,
Et de toutes femmes generaument,
Nostre secours requérans humblement,

Ou, se ce non, du tout desheritées
De leur honneur seront et ahontées.
Si se plaingnent les dessusdittes dames
Des grans extors, des blasmes, des diffames,
Des traïsons, des oultrages trés griefs,

Des faussetez et de mains autres griefs,
Que chascun jour des desloiaulx reçoivent,
Qui les blasment, diffament et deçoivent.
Sur tous païs se complaignent de France,
Qui jadis fu leur escu et deffense,

Qui contre tous de tort les deffendoit,
Com il est droit, et si com faire doit
Noble païs ou gentillece regne.
Mais a present elles sont en ce regne,
Ou jadis tant estoient honnourées,

Plus qu'autre part des faulz deshonnourées,
Et meismement, dont plus griefment se deulent,
Des nobles gens qui plus garder les seulent.
Car a present sont pluseurs chevaliers
Et escuiers mains duis et coustumiers

D'elles traÿr beaulx blandissemens.
Si se faignent estre loyaulx amans
Et se cueuvrent de diverse faintise;
Si vont disant que griefment les atise
L'amour d'elles, qui leur cuer tient en serre,

Dont l'un se plaint, a l'autre le cuer serre,
L'autre pleure par semblant et souspire,
Et l'autre faint que trop griefment empire,
Par trop amer tout soit descoulouré
Et presque mort et tout alangoré,

Et jurent fort et promettent et mentent
Estre loiaulx, secrez, et puis s'en vantent.
D'aler souvent et de venir se peinent,
Par ces moustiers ça et la se pormenent
En regardant, s'apuient sus aultelz

Par faulx semblans, moult en y a de telz
Parmi rues leurs chevaulx esperonnen
Gays et mignos a cliquetes qui sonnent;
Moult font semblant d'en estre embesoignez
Mules, chevaulz ne sont pas espargniez.

Diligens sont de bailler leurs requestes;
Moult enquierent ou sont nopces et festes,
La vont pluseurs jolis, mignoz et cointes,
Si font semblant de sentir de noz pointes
Si qu'a peine les peuvent endurer.

Aultres mettent grant peine a procurer
Par messages ou par quelque acointance
A mettre a fin ce que leur faulz cuer pense.
Par telz maintiens en plus de mille guises
Les faulz amans se cueuvrent de faintises,

C'est assavoir les desloiaulz qui héent
Foy, loiaulté, et a decevoir béent;
Car les loyaulz ne sont pas en ce compte,
Et ceulz doit on amer et tenir compte,
Car decevoir en nul cas ne vouldroient:

Je leur deffens; pour ce consens qu'ilz aient
De noz doulz biens savoureux bonne part,
Car a mes gens largement en depart;
Et ceulz tienent mes vrais commandemens,
Justes, loiaulz, et bons enseignemens

Si leur deffens villenie et meffait,
Et leur commans poursuivre honneur de fait,
Estre loiaulz, secrez et voir disans,
Larges, courtois, et fuïr mesdisans,
Humbles et doulz, jolis et assesmés,

Fermes et frans, poursuivre a estre amez,
Armes suïr a ceulx, qu'il apartient
Loz acquerir. Qui en ce point se tient,
Sache pour vray que ne lui fauldray mie
A lui donner dame belle et amie;

Car, quant ainsi je suis d'aucun servi,
Guerdon lui rens comme il a desservi.
Mais se bien vient a ces faulz d'aventure
N'est pas droit bien, combien que je l'endure,
Car en tous cas le bien est moult petit

Quant il est pris sanz desir n'appetit.
Et que vauldroit a homs descouragié
Grans viandes, ypocras ou saugié
Puis que saveur nulle ou pou y aroit?
Mais a cellui qui desirant seroit

De pain faittis ou d'une miche blanche,
S'ataindre y puet, Dieu scet com il la tranche
Joyeusement et de grant cuer s'en paist!
Ainsi de toute riens desirée est.
Ainsi, se trop ne sont aperceües,

Sont maintes fois les dames deceües,
Car simples sont, n'y pensent se bien non,
Dont it avient souvent, veullent ou non,
Qu'amer leur fault ceulz qui si les deçoivent,
Traïes sont ains qu'elles l'aperçoivent.

Mais quant ainsi sont fort envolopées,
Les desloiaulz qui les ont attrapées,
Or escoutez comment ilz s'en chevissent:
Ne leur souffist ce qu'ainsi les trahissent,
Ains ont compaings de leur male aliance;

Si n'y remaint ne fait ne couvenance
Qui ne soit dit l'un a l'autre, et, trop plus
Qu'ilz n'ont de bien, se vantent que reclus
Sont devenus en la chambre leurs dames
Dont sont amez, puis jurent corps et ames

Comment du fait il leur est avenu
Et que couché braz a braz y ont nu.
Les compaignons ce dient es tavernes,
Et les nobles font leurs pars et leurs sernes
En ces grans cours de noz seigneurs les ducs

Ou chieux le roy, ou ailleurs espandus,
Et la tienent de telz plais leurs escoles.
Pluseurs y a qui deussent leurs paroles
En bons contes drecier sanz bourderie
A raconter pris de chevalerie;

Mais auix grans feux a ces soirs, ou sus couches,
La rigolent l'un l'autre, et par reproches
S'entredient : "Je sçay bien de tes fais,
"Telle est t'amie et tu le jolis fais
"Pour sienne amour, mais pluseurs y ont part,

"Tu es receu quant un autre s'en part!"
La diffament les envieux la belle
Sanz achoison ne nul mal savoir d'elle
Et lors cellui qui en est rigolé
Monstre semblant qu'il en soit adoulé;

Mais moult lui plaist de ce qu'on l'en rigole
Et de son bec mainte parole vole
Qui blasme vault, combien qu'il s'en excuse;
En excusant celle nomme et accuse,
Et fait semblant de celer et couvrir

Ce qu'il lui plaist a dire et descouvrir.
D'aultres y a qui le rigol commencent
Ad celle fin que les autres s'avancent
D'eulx rigoler et d'eulx ramentevoir
Ce qu'ilz veulent a tous faire assavoir;

Si s'en rient et, tout en accusant,
Se vont du fait laschement excusant.
Si en y a qui se sont mis en peine
Qu'on les amast, mais perdu ont leur peine;
Si sont honteux dont ilz sont reffusé;

Ne veulent pas qu'on croie que musé
Ayent en vain, pour ce de ce se vantent
Qu'oncques n'avint, et, se en ce lieu hantent,
Pour aucun cas ou par quelque accointance,
De tout l'ostel conteront l'ordenance

Pour enseignes de confermer leurs bourdes.
La sont dites rnaintes paroles lourdes;
Et qui dire ne les, veult mie apertes
Les monstre au doigt par paroles couvertes;
La sont femmes moult laidement nommées

Souventes fois et sanz cause blasmées,
Et meismement d'aucunes grans maistresses,
Tant ayent ilz blondes ou brunes treces.
Dieux, quelz parleurs! Dieux, quelles assemblées
Ou les honneurs des dames sont emblées!

Et quel proffit vient d'ainssi diffamer
A ceulz meismes qui se deussent armer
Pour les garder et leur honneur deffendre?
Car tout homme doit avoir le cuer tendre
Envers fernme qui a tout homme est mere

Et ne lui est ne diverse n'amere,
Ainçois souefve, doulce et amiable,
A son besoing piteuse et secourable,
Qui tant lui a fait et fait de services,
Et de qui tant les oeuvres sont propices

A corps d'omme souefvement nourrir;
A son naistre, au vivre et au morir,
Lui sont femmes aidans et secourables,
Et piteuses, doulces et serviables.
Si est celui maucognoiscent et rude

Qui en mesdit, et plein d'ingratitude.
Encor dis je que trop se desnature
Homme qui dit diffame, ne laidure,
Ne reproche de femme en la blasment,
Ne une, ne deux, ne tout generaulment.

Et supposé qu'il en y ait de nyces
Ou remplies de pluseurs divers vices,
Sanz foy n'amour ne nulle loiaulté,
Fieres, males, plaines de cruaulté,
Ou pou constans, legieres, variables,

Cautelleuses, fausses et decevables,
Doit on pour tant toutes mettre en fremaille
Et tesmoignier qu'il n'est nulle qui vaille?
Quant le hault Dieu fist et forma les angelz,
Les cherubins, seraphins et archangelz,

N'en y ot il de mauvais en leurs fais?
Doit on pour tant angelz nommer mauvais?
Mais qui male femme scet, si s'en gart
Sanz diffamer ne le tiers ne le quart
Ne trestoutes en general blasmer

Et tous leurs meurs femenins diffamer;
Car moult en fui, est et sera de celles
Qui a louer sont com bonnes et belles
Et ou vertus et graces sont trouvée,
Sens et valeur en bonté esprouvées.

Et de blasmer celles qui le moins valent
Ceulz qui ce font, encor dis je qu'ilz falent,
S'ilz les nomment, disant qui elles sont,
Ou demeurent, quoy ne quelz leurs fais sont.
Car le pecheur on ne doit diffamer

Ce nous dist Dieux, n'en publique blasmer.
Les vices bien puet on et les pechiez
Trés fort blasmer, sanz ceulz qui entechiez
En sont nommer, ne diffamer nullui,
Ce tesmoigne l'escript ou je le lui.

De telz parleurs en y a a grans sommes,
Dont grant honte est tel vice en gentilz hommes:
Je di a ceulz qui en sont entechié
Non mie a ceulz qui n'y ont nul pechié,
Car maint y a des nobles si vaillans

Que mieulx perdre vouldroient leurs vaillans
Que de telz fais restez ne reprouvez
Fussent pour riens, n'en telz cas pris prouvez;
Mais les mauvais, dont je fais mencion,
Qui n'ont bon fait ne bonne entencion,

Ne prenent pas an bon Hutin exemple
De Vermeilles, ou bonté ot si ample
Qu'oncques nulz hommes n'y sceut que reprochier,
Ne nul mesdit en diffamant n'ot chier;
Souvrainement porta honneur aux femmes,

Ne peust ouir d'elles blasme ou diffames;
Chevalier fu preux, sage et bien amé,
Pour ce fu it et sera. renommé.
Le bon Othe de Grançon le vaillant,
Qui pour armes tant s'alla traveillant,

Courtois, gentil, preux, bel et gracieux
Fu en son temps, Dieux en ait l'ame es cieulx!
Car chevalier fu moult bien
Qui mal lui fist je tiens qu'il fist pechié,
Non obstant ce que lui nuisi Fortune,

Mais de grever aux bons elle est commune.
Car en touz cas je tiens qu'il fu loiaulz,
D'armes plus preux que Thalemon Ayaux.
Onc ne lui plot personne diffamer,
Les dames voult servir, prisier, amer.

D'aultres pluseurs furent bons et vaillans,
Estre doivent exemple aux deffaillans;
Encor en est maint, il est bien mestiers,
Qui des vaillans suivent les bons sentiers;
Honneur les duit, vaillance les y meine,

A acquerir pris et loz mettent peine,
De nobles meurs bien entechiez se perent,
Par leurs beaulz fais leurs vaillances apperent
En ce royaume, ailleurs et oultremer.
Mais je me tais de cy leurs noms nommer

Qu'on ne deist que ce feust flaterie,
Ou qu'il peüst tourner a vanterie.
Et telz doivent gentilz hommes par droit
Estre, autrement gentillece y fauldroit.
Si se plaingnent les dessusdittes dames

De pluseurs clers qui sus leur mettent blasmes
Dittiez en font, rimes, proses et vers,
En diffamant leurs meurs par moz divers;
Si les baillent en matiere aux premiers
A leurs nouveaulx et jeunes escolliers,

En maniere d'exemple et de dottrine,
Pour retenir en age tel dottrine.
En vers dient, Adam, David, Sanson,
Et Salemon et auitres a foison
Furent deceuz par femme main et tart;

Et qui sera donc li homs qui s'en gart?
Li autres dit que moult sont decevable
Cautilleuses, faulses et pou valables.
Autres dient que trop sont mencongieres,
Variables, inconstans et legieres,

D'autres pluseurs grans vices les accusent
Et blasment moult, sanz que riens les excusent.
Et ainsi font clers et soir et matin,
Puis en françois, leurs vers, puis en latin,
Et se fondent dessus ne sçay quelz livres

Qui plus dient de mençonges qu'uns yvres.
Ovide en dit, en un livre qu'il fist,
Assez de maulz, dont je tiens qu'il meffist,
Qu'il appella le Remede d'amours,
Ou leur met sus moult de villaines mours,

Ordes, laides, pleines de villenie.
Que telz vices aient je le luy nye,
Au deffendre de bataille je gage
Contre tous ceulz qui giter voldront gage;
Voire, j'entens des femmes honnorables,

En mes contes ne metz les non valables.
Si ont les clers apris trés leur enfance
Cellui livret en premiere science
De gramaire, et aux autres l'aprenent
A celle fin qu'a femme amer n'emprenent.

Mais de ce sont folz et perdent leur peine,
Ne l'empeschier si n'est fors chose vaine.
Car, entre moy et ma dame Nature,
Ne souffrerons, tant com le monde dure,
Que cheries et amées ne soient

Maugré touz ceulz qui blasmer les vouldroient,
Et qu'a pluseurs meismes qui plus les blasment
N'ostent les cuers, et ravissent et emblent.
Sanz nul frauder ne faire extorsion,
Mais tout par nous et nostre imprecion,

Ja n'en seront hommes si accointiez
Par soubtilz clers, ne pour touz leurs dittiez,
Non obstant ce que mains livres en parlent
Et les blasment qui assez pou y valent.
Et s'aucun dit qu'on doit les livres croire

Qui furent fais d'ommes de grant memoire
Et de grant sens, qui mentir ne daignerent,
Qui des fernmes les malices proverent,
Je leurs respons que ceulz qui ce escriprent
En leurs livres, je trouve qu'ilz ne quistrent

En leurs vies fors femmes decepvoir;
N'en pouoient yceulz assez avoir,
Et tous les jours vouloient des nouvelles,
Sanz loiaulté tenir, nez aux plus belles.
Qu'en ot David et Salemon le roy?

Dieu s'en courça et puni leur desroy.
D'autres pluseurs, et meismement Ovide
Qui tant en voult, puis diffamer les cuide;
Et tous les clers, qui tant en ont parlé,
Plus qu'autre gens en furent affolé,

Non pas d'une seule mais d'un millier.
Et, se tel gent orent darne ou moillier
Qui ne feïst du tout a leur vouloir
Ou qui meïst peine a les decevoir,
Quel merveille? Car il n'est nulle doubte

Que, quant uns homs en tel vilté se boute,
Il ne va pas querant les vaillans dames
Ne les bonnes prisiées preudes femmes,
Ne les cognoist, ne il n'en a que faire:
Fors ceulz ne veult qui sont de son affaire;

De filletes se pare et de pietaille.
Est il digne d'avoir chose qui vaille
Un vilotier qui toutes met en conte
Et puis cuide trop bien couvrir sa honte,
Quant plus n'en puet et qu'il est ja vieulz homs,

D'elles blasmer par ses soubtilz raisons?
Mais qui blasmast seulement les données
Aux grans vices et les abandonnees,
Et conseillast a elles non suivir
Comme ilz ont fait, bien s'en pourroit suivir

Et ce seroit chose moult raisonnable,
Enseignement digne, juste et louable,
Sanz diffamer toutes generaument.
Et a parler quant au decevement,
Je ne sçay pas penser ne concevoir

Comment femme peust homme decevoir:
Ne le va pas ne cerchier ne querir,
Ne sus son lieu prier ne requerir,
Ne pense a lui, ne ne lui en souvient,
Quant decepvoir l'omme et tempter la vient.

Tempter comment? – Voire par tel maniere
Qu'il n'est peine qui ne lui soit legiere
A endurer et faissel a porter.
A aultre riens ne se veult deporter
Fors a pener a elles decevoir,

Pour y mettre cuer et corps et avoir.
Et par long temps dure la trioleine,
Souventes fois avient, et celle peine,
Non obstant ce que moult souvent y faillent,
A leurs esmes ja soit ce qu'ils travaillent.

Et de ceulz parle Ovide en son traittié
De l'Art d'amours; car pour la grant pitié
Qu'il ot de ceulz compila il un livre,
Ou leur escript et enseigne a delivre
Comment pourront les femmes decevoir

Par faintises et leur amour avoir;
Si l'appella livre de l'Art d'amours;
Mais n'enseigne condicions ne mours
De bien amer, mais ainçois le contraire,
Car homs qui veult selon ce livre faire

N'amera ja, combien qu'il soit amez,
Et pour ce est li livres mal nommez,
Car c'est livre d'Art de grant decevance,
Tel nom li don, et de fausse apparence.
Et comment donc quant fresles et legieres,

Et tournables, nyces et pou entieres
Sont les femmes, si com aucuns clers dient,
Quel besoing donc est il a ceulz qui prient
De tant pour ce pourchacier de cautelles?
Et pour quoy tost ne s'i accordent elles

Sanz qu'il faille art n'engin a elles prendre?
Car pour chastel pris ne fault guerre emprendre.
Et meismement pouëte si soubtil
Comme Ovide, qui puis fu en exil,
Et Jehan de Meun ou Romant de la Rose,

Quel long procès! quel difficile chose!
Et sciences et cleres et obscures
Y met il la et de grans aventures!
Et que de gent soupploiez et rovez
Et de peines et de baraz trouvez

Pour decepvoir sanz plus une pucelle,
S'en est la fin, par fraude et par cautelle!
A foible lieu faut il donc grant assault?
Comment peut on de près faire grant saut?
Je ne sçay pas ce veoir ne comprendre

Que grant peine faille a foible lieu prendre,
Ne art n'engin, ne grant soubtiveté.
Dont convient il tout de neccessité,
Puis qu'art convient, grant engin et grant peine,
A decevoir femme noble ou villaine,

Qu'elz ne soient mie si variables,
Comine aucun dit, n'en leur fait si muables.
Et s'on me dit li livre en sont tuit plein,
C'est le respons a maint dont je me plain,
Je leur respons que les livres ne firent

Pas les femmes, ne les choses n'i mirent
Que l'en y list contre elles et leurs meurs;
Si devisent a l'aise de leurs cuers
Ceulz qui plaident leur cause sanz partie,
Sanz rabatre content, et grant partie

Ci Commence Le Dit de la Rose

A tous les Princes amoureux
Et aux nobles chevalereux,
Que vaillantise fait armer,
Et a ceulz qui seulent amer

Toute bonté pour avoir pris,
Et a tous amans bien apris
De ce Royaume et autre part,
Partout ou vaillance s'espart
A toutes dames renommés

Et aux damoiselles amées,
A toutes femmes honnorables,
Saiges, courtoises, agreables:
Humble recommandacion
De loyal vraye entencion.

Si fais savoir a tous vaillans,
Qui pour honneur sont travaillans,
Unes nouvelles merveilleuses,
Gracieuses, non perilleuses,
Qui avenues de nouvel

Sont en beau lieu plain de revel;
Aussi est droiz que ceulz le sachent
Qui mauvaistié devers eulz sachent,
A fin qu'ilz amendent leurs fais
Pour estre avec les bons parfais.

Si fu voir qu'a Paris advint,
Presens nobles gens plus de vint,
Joyeux et liez et senz esmois,
L'An quatre cens et un, ou mois
De janvier, plus de la moictié

Ains la date de ce dictié
Du mois passé, quant ceste chose
Advint en une maison close
Et assemblée de nobles gens,
Riches d'onnour et beaulx et gens.

Chevaliers y ot de renom
Et escuiers de vaillant nom.
Ne m'estuet ja leurs noms nommer,
Mais chascun les seult bons clamer;
Notables sont et renommés,

Des plus prisiez et mieulx amez:
Du très noble duc d'Orliens,
Qui Dieu gart de tous maulx liens,
Si sont de son hostel tous ceulz.
Et n'y avoit pas un tout seulz

Qui n'aime, je croy, tous bons fais;
Leans a assez de si fais.
Assemblez les ot celle part
Courtoisie qui ne depart
De ceulz qui sont de gentil sorte.

La fu bien fermée la porte,
Car vouloient en ce lieu estre
Senz estranges gens privez estre
Pour deviser a leur plaisir.
La fu appresté a loisir

Le souppe; si furent assis
Joyeux et liez et non pensis.
Bien furent servis par les tables
De mez a leur gré delitables.
Car ne fu, j'en ose jugier,

Pas tout leur plaisir ou mangier
Mais en la compaignie qui
De vraye et bonne amour nasqui.
Liez estoient et esbatans,
Gays et envoisiez et chantans

Tout au long de cellui souper,
Comme gent qui sont tout un per
Et amis vrais sens estrangier.
La n'ot parlé a ce mangier
Fors de courtoisie et d'onnour,

Senz diffamer grant ne menour,
Et de beaulx livres et de dis,
Et de balades plus de dix,
Qui mieulx mieulx chascun devisoit,
Ou d'amours qui s'en avisoit

Ou de demandes gracieuses.
Viandes plus delicieuses
N'y ot, com je croy, a leur goust,
Tout soyent d'assez petit coust,
Et de ris et de bonne chiere;

De ce n'orent ils pas enchiere.
Ainsi se firent longuement
En ce gracieux parlement.
Mais Amours, ses loyaulx amis,
Qui a valeur se sont soubzmis,

Volt visiter droit en ce point,
Car alors seurvint tout a point,
Non obstant les portes barrées
Et les fenestres bien sarrées,
Une dame de grant noblesse

Qui s'appella dame et deesse
De Loyauté, et trop belle yere.
La descendi a grant lumiere
Si que toute en resplent la sale.
Toute autre beauté si fut pale

Vers la sienne de corps, de vis
Et de beau maintien, a devis
Bien parée et bien atournée.
Si fu entour avironnée
De nymphes et de pucelletes

Atout chappelles de fleurettes,
Qui chantoient par grant revel
Hault et cler un motet nouvel
Si doulcement, pour voir vous dis,
Que bien sembloit que Paradis

Fut leur reduit et qu'elz venissent
De cellui dont fors tous biens n'issent,
Celle deesse a tel maisgnie.
Devant la table a compaignie
Vint o les siennes bien parées,

Si tenoient couppes dorées,
Si comme pour faire en present
A celle gent nouvel present.
Adonc fu la sale estourmie,
Il n'y ot personne endormie,

Tuit furent veoir la merveille,
Il n'y ot cellui qui l'oreille
Ne tendist pour bien escouter
Que celle leur vouloit noter;
Chascun se tut pour y entendre.

Quant les pucelles a cuer tendre
Orent leur chançon affinée
Adonc se prist la belle née,
Qui d'elles dame et maistresse yere,
A dire par belle maniere

Ces parolles qui cy escriptes
Sont en ces balades et dittes.
Ne plus ne moins les ennorta
Et les balades apporta:

Balade.

Cil qui forma toute chose mondaine
Vueille tousdiz en santé mantenir
Et en baudour de grant leesse plaine
Ceste belle compaignie et tenir.
Deesse suis, si me doit souvenir
De trestous bons et des bonnes et belles.

Pour ce qu'ainsi il doit appartenir
Venue suis vous apporter nouvelles.
De par le dieu d'amours, qui puet la peine
Des fins amans desmettre et defenir,
Present nouvel, gracieux, d'odeur saine,

Je vous apport et salus sens fenir,
Si m'escoutez et vueilliez retenir:
Car je vous di que de hauttes querelles,
Dont il pourra assez de biens venir,
Venue suis vous apporter nouvelles.

De Loyauté deesse souveraine
On m'appelle, et a mon seurvenir
Je ne port pas de discorde la graine,
Com fist celle qui Troyes fist bannir;
Ains, pour tousjours loyauté soustenir.

Et pour oster les mauvaises favelles
Et les mauvais desloyaulx escharnir,
Venue suis vous apporter nouvelles.

Balade.

Le dieu d'Amours par moy il vous presente
Ces roses ci de voulenté entiere,

Cueillies sont de trés loyal entente
Es beaulx vergiers dont je suis courtilliere.
Si vous mande qu'a trés joyeuse chiere
Preigniez le don, mais c'est par convenant
Que desormais en trestoute maniere

Yrez l'onneur des dames soustenant.
Si veult qu'ainçoiz que nullui se consente
A recevoir la rose belle et chiere,
Qu'il face veu que jamaiz il n'assente
Blasme ou mesdit en nesune maniere

De femme qui son honneur tiengne chiere,
Et pour ce a vous m'envoye maintenant.
Si vouez tous qu'a parolle pleniere
Yrez l'onneur des dames soustenant.
Chevaliers bons et tous de noble sente,

Et tous amans, c'est bien droit qu'il affiere
Qu'a ce veu ci vo cuer se represente;
Amours le veult, si n'y mettés enchiere,
Mais ne soit pas de voulenté legiere,
Car a l'estat de vous appartenant;

Et si jurez que jusques a la biere
Yrez l'onneur des dames soustenant.
En disant ces balades cy
La deesse, sienne mercy,
Assist les couppes sur les tables.

Dedéns ot roses odorables,
Blanches, vermeilles et trop belles,
Et cueillies furent nouvelles.
Et avecques ce presentoit
En beaulx rolez qu'elle gectoit

Ceste balade, qui recorde
Qu'Amours veult, qu'ainçois qu'on accorde
A prendre la jolie rose,
Que l'en face veu de la chose
Qui est en l'escript contenu

Et qu'il soit juré et tenu.
Et qui tout ce vouldra vouer
Et celle promesse advouer,
Hardiement preingne la rose
Ou toute doulçour est enclose.

Si oyez lire la balade
Qu'apporta la deesse sade:

Balade.

A bonne amour je fais veu et promesse
Et a la fleur qui est rose clamée,
A la vaillant de Loyauté deesse,

Par qui nous est ceste chose informée,
Qu'a tousjours mais la bonne renommée
Je garderay de dame en toute chose
Ne par moy ja femme n'yert diffamée
Et pour ce prens je l'Ordre de la Rose.

Et si promet a toute gentillesse
Qu'en trestous lieux et prisée et amée
Dame sera de moy comme maistresse.
Et celle qui j'ay ma dame nommée
Souveraine loyauté confermée

Je lui tendray jusques a la parclose,
Et de ce ay voulenté affermée:
Et pour ce prens je l'Ordre de la Rose.
Et si merci Amours et son humblesse
Qui nous a cy tel semence semée

Dont j'ay espoir que serons en l'adresse
De mieulx valoir; c'est bien chose informée
Que de lui vint honneur trés renommée.
Si defendray, s'aucun est qui dire ose,
Chose par quoy dame estre puist blasmée:

Et pour ce prens je l'Ordre de la Rose.
Princes haultains, ou valeur est fermée,
Faites le veu, bonté y est enclose,
L'enseingne en vueil porter en mainte armée:
Et pour ce prens je l'Ordre de la Rose.

Adonc furent en audiance
Levez, et, senz contrariance,
Firent tous le beau veu louable
Qui est gentil et honnorable.
Quant nullui ne vit contradire

La deesse adonc prist a dire
Ce rondelet, prenant congié,
Si n'y a pensé ne songié:
Or m'en vois dire les nouvelles
Au dieu d'Amours qui m'envoya.

De ses belles roses nouvelles
Or m'en vois dire les nouvelles.
A Dieu vous dy, tous ceulz et celles
Que bonne amour cy avoya,
Or m'en vois dire les nouvelles.

Quant ce fut dit, lors s'envola
Celle deesse qui vint la.
Mais les nymphes qui furent liez
De leurs doulcs voix deliez
Commencierent tel mellodie,

Ne cuidez que mençonge die,
Que il sembloit a leur doutz chant
Qu'angelz feussent ou droit enchant.
Ainsi parti de celle place
La deesse, qui de sa grace

Ot la conpaignie esjoye,
Tel nouvelle leur ot gehie,
D'elle font feste et de ses choses
Et tous se parent de ses roses,
Par teste, par braz, par poitrine,

En promettant foy enterine,
Si comme ou veu est devisé
Qu'ilz orent moult bien avisé.
Quant assez selon leur loisir
Orent esté en ce plaisir,

Chantans, rians a chiere lie
Senz dueil et senz merencolie,
Partis s'en sont, congié ont pris,
Emportant la rose de pris.
Et je qui n'oz pas le cuer noir

Demouray en cellui manoir
Ou ot esté celle assemblée,
Ou je ne fus de riens troublée.
Tart fut ja et saison en l'eure
D'aler couchier, et bien fu heure;

Mais la deesse qui m'ama,
Sienne merci, et me clama
Sa belle suer de cuer eslit
M'ot appresté un trop beau lit,
Blanc comme noif, encourtiné

Richement et bien ordonné,
En belle chambre toute blanche
Comme la noif qui chet sur branch;
Pour ce l'ot fait, je n'en doubt mie,
Que je suis a Dyane amie,

La deesse trés honnourée
Qui toudiz de blanc est parée.
La me couchay seulette et nue,
Et m'endormy. Lors une nue
Si m'apparu en mon dormant

Clere et luisant; de ce forment
Me merveillay que pouoit estre.
De la nue, qui fu a destre
Costé du lit, luisant et clere,
Comme en esté temps qui esclere,

Yssi une voix gracieuse,
Trop plaisant et trop amoureuse;
Adonc, ou que dormisse ou non,
La voix m'appella par mon nom,
Si me dist lors: "Amie chiere

"Qui m'as amée et tenu chiere
"Toute ta vie, bien le sçay,
"Car souvent t'ay mise a l'essay,
"Je suis la deesse loyale
"De la haulte ligne royale

"De Dieu qui me fist et fourma
"Et de ses rigles m'enforma.
"Or m'entens, m'amie certaine,
"Et je te diray qui me maine:
"Tu scez comment en ta presence

"Je vins presenter par plaisance
"Nagueres les roses jolies,
"Qui en nul temps ne sont palies,
"De par vraye Amour, qui conduit
"Ceulx qui de bien faire sont duit,

"Qui encor devers toy m'envoye,
"Messagiere de ceste voye
"Lui plaist que soye par usage,
"Et voulentiers fais le message
"Amours se plaint trop fort et duelt

"D'une coustume qui trop suelt
"Estre en mains lieux continuée,
"Bien vouldroit qu'elle fust muée,
"Car elle est male, laide et vilz,
"Et vilaine, je te plevis,

"Et par especial en ceulx
"Qui ne doivent estre preceux
"D'acquerir toutes bonnes meurs
"Pour plus acroistre leurs honneurs,
"C'est es nobles et es gentilz

Je, Christine, qui ay plouré
XI ans en abbaye close,
Où j'ay tousjours puis demouré
Que Charles (c'est estrange chose!),
Le filz du roy, se dire l'ose,
S'en fouy de Paris de tire,
Par la traïson là enclose,
Ore à prime me prens à rire;

A rire bonement de joie
Me prens pour le temps yvernage
Qui se depart, où je souloie
Me tenir tristement en cage.
Mais or changeray mon langage
De pleur en chant, quant recouvré
Ay bon temps
Bien ma part avoir enduré.

L'an mil CCCCXXIX
Reprint à luire li soleil.
Il ramene le bon temps neuf
Qu'on [n'] avoit veü de droit oil
Puis long temps, dont plusers en dueil
Orent vesqu; j'en suis de ceulx.
Mais plus de rien je ne me dueil,
Quant ores voy ce que [je] veulx.

Si est bien le vers retourné
De grant dueil en joie nouvelle
Depuis le temps qu'ay sejourné
Là où je suis, et la tresbelle
Saison, que printemps on appelle,
La Dieu mercy, qu'ay desirée,
Où toute rien se renouvelle,
S'est du sec au vert temps tirée.

C'est que le degeté enfant
Du roy de France legitime,
Qui long temps a esté souffrant
Mains grans ennuiz, qui or aprime,
Se lieva ainsi que vers prime,
Venant comme roy coronné
En puissance tresgrande et fine,
Et d'espérons d'or espronné.

Or faisons feste à nostre roy!
Que tresbien soit-il revenu!
Resjoïz de son noble arroy,
Alons trestous, grant et menu,
Au devant – nul ne soit tenu! –
Menant joie le saluer,
Louant Dieu, qui l'a maintenu,
Criant "Noël!" en hault huer.

Mais or vueil raconter comment
Dieu a tout ce fait de sa grace,
A qui je pri qu'avisement
Me doint, que rien je n'y trespasse.
Raconté soit en toute place,
Car ce est digne de mémoire,
Et escript, à qui que desplace,
En mainte cronique et hystoire!

Oyez par tout l'univers monde
Chose sur toute merveillable!
Notez se Dieu, en qui habonde
Toute grace, est point secourable
Au droit en fin. C'est fait notable,
Consideré le présent cas!
Si soit aux deceilz valable,
Que Fortune a flati à cas!

Et note[z] comment esbahir
Ne se doit nul pour infortune,
Se voiant à grant tort haïr,
Et courir sus par voix commune!
Voie[z] comment tousjours n'est une
Fortune, qui a nuit à maint!
Car Dieu, qui aux tors faiz repune,
Ceulx relieve en qui espoir maint.

Qui vit doncques chose avenir
Plus hors de toute opinion
(Qui à noter et souvenir
Fait bien en toute région),
Que France (de qui mention
On faisoit que jus ert ruée)
Soit, par divine mission,
Du mal en si grant bien muée,

Par tel miracle voirement
Que, se la chose n'yert notoire
Et évident quoy et comment,
Il n'est homs qui le peiist croire?
Chose est bien digne de mémoire
Que Dieu, par une vierge tendre,
Ait adès voulu (chose est voire!)
Sur France si grant grace estendre.

0 quel honneur à la couronne
De France par divine preuve!
Car par les graces qu'Il lui donne
Il appert comment Il l'apreuve,
Et que plus foy qu'autre part treuve
En l'estat royal, dont je lix
Qu'oncques (ce n'est pas chose neuve!)
En foy n'errerent fleurs de lix.

Et tu, Charles, roy des François,
VIIe d'icellui hault nom,
Qui si grant guerre as eue aincois
Que bien t'en prensist se peu non:
Mais, Dieu grace, or voiz ton renon
Hault eslevé par la Pucelle,
Qui a soubzmis soubz ton penon
Tes ennemis (chose est nouvelle!)

En peu de temps; que l'on cuidoit
Que ce feust com chose impossible
Que ton pays, qui se perdoit,
Reusses jamais. Or est visible –
Ment tien, [puis que] qui que nuisible
T'ait esté, tu l'as recouvré!
C'est par la Pucelle sensible,
Dieu mercy, qui y a ouvré!

Si croy fermement que tel grace
Ne te seroit de Dieu donnée,
Se à toy, en temps et espace,
Il n'estoit de Lui ordonnée
Quelque grant chose solempnée
A terminer et mettre à chief,
Et qu'Il t'ait donné destinée
D'estre de tresgrans faiz le chief.

Car ung roy de France doit estre
Charles, filz de Charles, nommé,
Qui sur tous rois sera grant maistre.
Propheciez l'ont surnommé
"Le Cerf Volant," et consomé
Sera par cellui conquereur
Maint fait (Dieu l'a à ce somé),
Et en fin doit estre empereur.

Tout ce est le prouffit de t'ame.
Je prie à Dieu que cellui soies,
Et qu'Il te doint, sans le gref d'ame,
Tant vivre qu'encoures tu voyes
Tes enfans grans, et toutes joyes
Par toy et eulz soient en France!
Mais en servant Dieu toutesvoies,
Ne guerre [plus] n'y face oultrance!

Et j'ay espoir que bon seras,
Droiturier et amant justice,
Et [tres] tous autres passeras,
Mais qu'orgueil ton fait ne honnisse;
A ton pueple doulz et propice,
Et crairignant Dieu, qui t'a esleu
Pour son servant (si com prémisse
En as), mais que faces ton deu.

Et comment pourras-tu jamais
Dieu mercier à souffisance,
Servir, doubter en tous tes fais,
Qui de si grant contrariance
T'a mis à paix, et toute France
Relevée de tel ruyne,
Quant sa tressainte providence
T'a fait de si grant honneur digne?

Tu en soyes loué, hault Dieu!
A Toy gracier tous tenuz
Sommes, qui donné temps et lieu
As, où ces biens sont avenus.
[A] jointes mains, grans et menus,
Graces Te rendons, Dieu céleste,
Par qui nous sommes parvenus
A paix, et hors de grant tempeste!

Et toy, Pucelle beneurée,
Y dois-tu estre obliée,
Puis que Dieu t'a tant honnorée
Que as la corde desliée
Qui tenoit France estroit liée?
Te pourroit-on assez louer
Quant ceste terre, humiliée
Par guerre, as fait de paix douer?

Tu, Jehanne, de bonne heure née,
Benoist soit cil qui te créa!
Pucelle de Dieu ordonnée,
En qui le Saint Esprit réa
Sa grant grace, en qui ot et a
Toute largesse de hault don,
N'onc requeste ne te véa.
Qui te rendra assez guerdon?

Que puet-il d'autre estre dit plus
Ne des grans faiz des temps passez?
Moÿses, en qui Dieu afflus
Mist graces et vertuz assez,
Il tira, sans estre lassez,
Le pueple de Dieu hors d'Egipte
Par miracle. Ainsi repassez
Nous as de mal, Pucelle eslite!

Considerée ta personne,
Qui es une jeune pucelle,
A qui Dieu force et povoir donne
D'estre le champion et celle
Qui donne à France la mamelle
De paix et doulce norriture,
Et ruer jus la gent rebelle,
Véez bien chose oultre nature!

Car, se Dieu fist par Josué
Des miracles à si grant somme,
Conquérant lieux, et jus rué
Y furent maint, il estoit homme
Fort et puissant. Mais, toute somme,
Une femme – simple bergiere –
Plus preux qu'onc homs ne fut à Romme!
Quant à Dieu, c'est chose legiere.

Mais quant à nous, oncques parler
N'oÿsmes de si grant merveille,
Car tous les preux au long aler
Qui ont esté; ne s'appareille
Leur prouesse à ceste qui veille
A bouter hors noz ennemis.
Mais ce fait Dieu, qui la conseille,
En qui cuer plus que d'omme a mis.

De Gedeon on fait grant compte,
Qui simple laboureur estoit,
Et Dieu le fist, ce dit le conte,
Combatre, ne nul n'arrestoit
Contre lui, et tout conquestoit.
Mais onc miracle si appert
Ne fist, quoy qu'Il ammonestoit,
Com pour ceste fait, il appert.

Hester, Judith et Delbora,
Qui furent dames de grant pris,
Par lesqueles Dieu restora
Son pueple, qui fort estoit pris,
Et d'autres plusers ay apris
Qui furent preuses, n'y ot celle,
Mains miracles en a pourpris.
Plus a fait par ceste Pucelle.

Par miracle fut envoiée
Et divine amonition,
De l'ange de Dieu convoiée
Au roy, pour sa provision.
Son fait n'est pas illusion,
Car bien a esté esprouvée
Par conseil (en conclusion,
A l'effect la chose est prouvée),

Et bien esté examinée
A, ains que l'on l'ait voulu croire,
Devant clers et sages menée
Pour ensercher se chose voire
Disoit, ainçois qu'il fust notoire
Que Dieu l'eust vers le roy tramise.
Mais on a trouvé en histoire
Qu'à ce faire elle estoit commise;

Car Merlin et Sebile et Bede,
Plus de Vc ans a la virent
En esperit, et pour remede
En France en leurs escripz la mirent,
Et leur[s] prophecies en firent,
Disans qu'el pourteroit baniere
Es guerres françoises, et dirent
De son fait toute la maniere.